мирзамахмуд ботиров -армон-

                                    АРМОН

Отам мени юпатмаган,тўксам ёшимни,

Ўғлим дебон суюнмаган силаб бошимни,

Онам – отам бўлиб топган нону-ошимни,

Уйда аёл – кўчада эр – бўлган – Онажон!

Сизга шараф – сизга таълим қилсин кенг жаҳон.

Ўн гулидан – битта гули очилмай сўлган,

Қалби эмас – кулса фақат лаблари кулган,

Отам ўлган куни билсам қуёшим сўнган,

Уйда аёл – кўчада эр – бўлган Онажон!

Сизга шараф – сизга таъзим қилсин кенг жаҳон.

Ўғил қизин бирини ой-бирин кун билиб,

Фарзандларин бўйин қучиб минг шукр қилиб,

Рўзғор деган дунё ғамин бўйнига илиб,

Уйда аёл – кўчада эр – бўлган Онажон!

Сизга шараф – сизга таъзим қилсин кенг жахон.

Ўғлин эркак қилиб белбоғ боғлатиб куйган,

Қизин аёл қилиб рўмол ўратиб куйган,

Ўзбек қилиб миллийликни сингдириб қўйган,

Уйда аёл – кўчада эр – бўлган  Онажон!

Сизга шараф – сизга  таъзим қилсин кенг жаҳон.

Шундай аёл пойига минг чўксак арзийди,

Шундай аёл ҳоки – пойин ўпсак арзийди,

Садоқатли аёлга жон,берсак арзийди,

Уйда аёл – кўчада эр – бўлган Онажон!

Сизга шараф – сизга таъзим қилсин кенг жаҳон.

Мирзомаҳмуд ашорлар ёз Онажонингга,

Дунё-дунё достонлар ёз Меҳрибонингга,

Борингни бер – жонингни бер Жонажонингга,

Уйда аёл – кўчада эр – бўлган Онажон!

Сизга шараф – сизга таъзим қилсин кенг жаҳон.