АБДУЛЛА ОРИПОВ

,

Ўзбекистон Қаҳрамони, Халқ шоири

ПАРКЕНТ

Қадим Паркент тоғларида сайр этдим хуррам,
Турли-туман ғавғолардан, ўйлардан холи.
Қониб-қониб сувлар ичдим булоқлардан ҳам,
Бир замонлар меҳмон бўлган Бобур мисоли.



Юксак қорли чўққиларда ин қурган бургут,
Қоя билан бўйлашгандай тераклар қатор.
Токзорлардан анқиб турар баракаю қут,
Бунда шодлик, бунда қувонч, бунда ором бор.

Адирлар-чи, бамисоли ёйилган кашта,
Мафтун этган ўшанда ҳам балки Мирзони.
Бир ёнда тоғ, бир томонда булут саргашта,
Эсга солар ҳам собиту нотинч дунёни.

Тақдир таъқиб этар эди Бобурни у пайт,
Тахти кетган, Андижон ҳам бўлганди абас.
Шу тоғларга видо айтиб битганида байт,
Топилганми “Қолинг!” деган бирорта бир кас.

Шоҳ бўлса ҳам, ҳинд филлари чўкса ҳамки тиз,
Тамға бўлди манглайида ҳижроннинг доғи.
Қорақумга тенг келмади Панипат ҳаргиз,
Чотқол ўрнин босолмади Ҳиндикуш тоғи.

Мен учун ҳеч ташвиш қилманг, муҳтарам мезбон,
Мен оддий бир инсондирман, кўнгил бўлсин тўқ.
Бафуржаман, шоширмасман сизни ҳеч қачон,
Ахир менинг борадиган Ҳиндистоним йўқ.
Яқинларингизга ҳам улашинг.
Cоғлиғингиз учун севимли канал . Сизлар билан доим Каналга аъзо бўлиш учун линкни босинг👇👇👇
www.malhamuz.blogspot.com
🌹
🌿 🍒💞🍇 телеграмда @malhamuz