Abduqadir Sattarov· Лаб қуришига

Abduqadir Sattarov· 
Лаб қуришига қарши уй шароитидаги самарали воситалар
Лаблар гўзаллиги шубҳасиз аёл ташқи кўринишининг бир қисмини ташкил этади. Лабнинг жуда қуриб кетиши ташқи кўринишимиздан хавотирга тушишимизга сабаб бўлади. Ушбу муаммони бартараф этиш учун лаб терисини парвариш қилишга мўлжалланган махсус воситалардан
фойдаланиш мумкин.
Лабнинг қуриб қолишига совуқ ёки жуда қуёшли об-ҳаво, шунингдек, узоқ вақт давомида қуруқ хонада бўлиш сабаб бўлиши мумкин. Бундан ташқари, витаминлар етишмовчилиги, етарли миқдорда суюқлик ичмаслик, қолаверса, организмнинг витамин ва микроэлементларни йўқотишига сабаб бўлувчи бирор хасталик ҳам лабларнинг қуришини келтириб чиқаради.
Агар сиз уйда бўлсангиз, лаблар учун мўлжалланган махсус воситангиз эса тугаб қолган бўлса, уларга сарёғ суриб қўйиш мумкин. Унинг таркибидаги Е витамини терини тезда юмшатиб, уни намлантиради ва қуруқликни бартараф этади.
Лаблар пўст ташлаганда эса оддий шакар ёрдам бериши мумкин. Уни камроқ ўсимлик ёғи билан аралаштириб, лабларни у билан уқалаш лозим. Бу ўзига хос скраб қотиб қолган қатламларни тозалаб, пўст ташлашни йўқ қилади, шу ҳудуддаги моддалар алмашинувини яхшилайди. Лабнинг табиий рангини қайтаради.
Лаб қуришига қарши уй шароитида қўллаш мумкин бўлган воситаларга яна ёғли сметана ва қатиқни киритиш мумкин.
Агар лабнинг қуриши унинг ёрилишига олиб келган бўлса, мойчечак, қичитқи ўт ёки наъматакни қайнатиб, у билан пахтани намлаб, 5 дақиқа давомида компресс қилинг. Шундан сўнг, лабга бодринг, сабзи ёки ошқовоқли шарбатдан суриб қўйиш мумкин.
Лаб ҳолатини яхшилаш учун бананли бўтқа ва аччиқ шоколаддан ҳам фойдаланиш мумкин. Фақат шоколад таркибидаги какао 75 фоиздан кам бўлмаслиги лозим.
Юқоридаги воситалар уй шароитида қўл остимизда мавжуд бўлган воситалардир. Бундан ташқари, махсус воситалар, турли бальзамлар ва гигиеник лаб бўёқларидан ҳам фойдаланиш мумкин.
Лаб қуришининг олдини олиш
1. Етарлича сув ичинг
2. Ҳафтада бир марта лаб учун ўтлардан компресс қилинг. Улар беш дақиқа тутиб турилгандан кейин, лабингизга бальзам суринг.
3. Лабдаги пардозни яхшилаб ювиб ташланг. Пардоз воситаларининг қолдиқлари тери ҳолатини ва ундаги алмашинув жараёнини ёмонлаштиради.
4. Е витамини етишмовчилигини тўлдириш учун махсус витаминлар комплексини қабул қилинг. Денгиз маҳсулотлари, балиқ, кўкатлар, авакадо ва цитрус меваларни истеъмол қилиш ҳам айни муддаодир.
5. Овқатланиш тартибига аҳамият қаратинг. Рационнинг тўғри ташкил этилиши соғлиқ ва гўзаллик гаровидир.
6. Агар юқорида келтирилган воситалар ёрдамида лабдаги қуруқликни бартараф этиб бўлмаса, дерматологга мурожаат қилинг. Бу бирор хасталик чақирган муаммо бўлиши мумкин.
Гўзаллик сизни ҳеч қачон тарк этмасин!