туйғулар

ТУЙҒУЛАР
Дунё ишларига боқиб ҳайрон, лол,
Шогирд устозига берди-ку савол:
- Мудом ўтганларни ёд айлагаймиз,
Ёд айлаб, руҳларин шод айлагаймиз.

Деворларга осиб чўгирмасини,
Ўтказамиз етти, йигирмасини.



Сўнгра қирқи бўлар, йили бўлади,
Кетгандан қолганнинг кўнгли тўлади.

Чорлаб мамлакатни эҳсон ошига,
Байтлар ҳам битамиз қабр тошига.

Буларнинг барчаси савоб, албатта,
Тирик бандаларга ибратдир катта.

Инсонлик рутбаси нечоғ муҳташам,
Елкада элтамиз ҳаммасини ҳам.

Бироқ ечолмадим мен бир саволни,
Шарҳлай ололмадим сира бу ҳолни.

Инсонда жам бўлмиш не-не туйғулар,
Улар ҳам туғилар, яшар ва ўлар.

Нечун туйғу ўлса очилмас аза,
Нечун ўқилмайди унга жаноза?

Марҳум бўлиб кетди чунончи виждон,
Кўз ёши тўкмади биронта инсон.

Кимдир ўқ узибди туриб панада,
Меҳр ҳалок бўлди Қўриқхонада.

Меҳрсиз қолса ҳам катта-кичик жим,
Гўё эшитмаган бу гапни ҳеч ким.

Бир ҳакам Инсофдан сўрабди пора,
Кўксига тиғ урмиш Инсоф бечора.

Ҳаё ҳам осибди дорга ўзини,
Биров айтгани йўқ таскин сўзини.

Ҳеч ким парво қилмас бундай заволга,
Устоз, жавоб беринг ушбу саволга.

Кўзларини юмиб валилар каби,
Устоз жавоб қилди қимтиниб лаби:

- Аза очилмайди ҳеч кимга агар 
Тирикликдан бўлса заррача асар.

Сен бунча ваҳима қилма, болажон,
Уларнинг кўплари ҳали чалажон.

Агарда бутунлай топсалар барҳам,
Бўлмасди уларни сўровчилар ҳам.
2006 Абдулла Орипов 🌹ЎЗ ЯҚИНЛАРИНГИЗГА ҲАМ УЛАШИНГ!  Cоғлиғингиз учун севимли канал . Сизлар билан доим Бизни кузатиб боринг!!! сайтда www.malhamuz.blogspot.com   
телеграмда 👉   @malhamuz    онлайн группа 👉@saratondavosi  🙏👍🏻🌷https://t.me/malhamuz