мусофирим

_______"МУСОФИРИМ"__________

Ўзга юртда юрганимга кулманг оға,
Қайси нодон бир неча бор таъна қилибди
Майли сизлар бизлар каби бўлманг, оға,
Мусофирлик нонин есак, нима қилибди?

Ризқимизни сочган экан узоқларга,
Териб ҳалол юрдик тушмай тузоқларга,


Сомонхона йўлин айтинг бузоқларга,
Мусофирлик нонин есак, нима қилибди?

Биз Ватандан юз бурмадик, бурмаймиз ҳам,
Душман келса жим кузатиб турмаймиз ҳам,
Сизлар каби юртдошни кам кўрмаймиз ҳам,
Мусофирлик нонин есак, нима қилибди?

Ватанида юриб ҳаром топганлар бор,
Дўстим дея оёқларин чопганлар бор,
Шу Ватанда яшаб уни сотганлар бор,
Мусофирлик нонин есак, нима қилибди?

Қайда бўлсак Африками Осиёда,
Америка яна узоқ Кореада,
Елка бериб ишлаяпмиз Россияда,
Мусофирлик нонин есак, нима қилибди?

Биз меҳнаткаш, ғафлатимиз ўлдирамиз,
Чарчоқ келса тик боқамиз, кулдирамиз,
Ахир бизлар Ватан банкин тўлдирамиз,
Мусофирлик нонин есак, нима қилибди?

Қайси юртда мусофир йўқ, бор барида,
Бири бунда яна бири ҳув нарида,
Бу дунёга ўч эмаслар ер қаърида,
Мусофирлик нонин есак, нима қилибди?

Меҳнат қилсак,ҳақ оламиз, эмасмиз қул,
Ҳалолдан нон топиш бизга энг улуғ йўл,
Ватанга ишқ ва муҳаббат сендан кўп, бил,
Мусофирлик нонин есак, нима қилибди?

Бизларга ҳам осон эмас ғариб юрмоқ,
Фарзанд, ота-онани бир йилда кўрмоқ,
Тақдир экан мусофирлик гаштин сурмоқ,
Мусофирлик нонин есак, нима қилибди?

Ҳали шошманг, биз Ватанни қиламиз шод,
Ҳар қаричин асрагаймиз, этиб обод,
Чапак чалиб, изза бўлма қилибла дод,
Мусофирлик нонин есак, нима қилибди